Loyihadagi maydon — eng oson o'lchanadigan ko'rsatkichlardan biri. Uni hisoblash, taqqoslash va loyihaning iqtisodiy modelini shakllantirishda hisobga olish mumkin. Biroq kvadrat metrning o'zi inson bu makonda o'zini qanday his qilishini belgilab bermaydi.
Bir xil maydonga ega bo'lgan ikki interyerdan biri tor, ortiqcha to'ldirilgan va noqulay tuyulishi, ikkinchisi esa keng, erkin va turli imkoniyatlarga boy makon sifatida qabul qilinishi mumkin. Bu farq proporsiyalar, fazoviy bog'lanishlar, mebel joylashuvi, yorug'lik, harakat yo'nalishlarining kengligi hamda ochiq va nisbatan yopiq zonalar o'rtasidagi munosabatlar orqali shakllanadi.
Arxitekturaviy loyihalashda biz aynan shu jihatlarga e'tibor qaratamiz: inson makonga qanday kirishi, uni qanday qabul qilishi, unda qanday harakatlanishi va turli zonalardan qanday foydalanishigacha bo'lgan jarayonni oldindan o'ylab chiqamiz. Chunki makonni his qilish tasodifiy emas — u proporsiyalar, ko'rish nuqtalari, yorug'lik va funksional stsenariylarning o'zaro uyg'unligi natijasidir.
Puxta ishlangan stsenariylar har bir kvadrat metrni shunchaki maydonning bir qismi emas, balki umumiy konsepsiyaga xizmat qiladigan arxitekturaviy vositaga aylantiradi. Bunday yondashuv orqali makonning fizik o'lchamlarini o'zgartirmasdan turib, uning kenglik hissini va funksional imkoniyatlarini oshirish mumkin.
Biz uchun dizayn sifati makonning qancha kvadrat metr ekani bilan emas, balki shu maydondan qanday arxitekturaviy imkoniyatlar yarata olganimiz bilan o'lchanadi
Loyihalarimiz haqida bildiriladigan fikrlar orasida ularning haqiqiy maydonidan ko'ra kengroq his qilinishi haqidagi mulohazalar bor. Bu esa biz uchun arxitekturaviy yondashuvimiz samaradorligini ko'rsatuvchi muhim mezonlardan biridir.